Башкортстанның «Китап» нәшрияты гомуми тираж буенча Россиянең 50 нәшрияты арасына кергән
Башкортстанның Зәйнәп Биишева исемендәге «Китап» нәшрияты беренче тапкыр 2024 елда гомуми тираж буенча Россиянең 50 нәшрияты арасына кергән. Бу хакта «Башинформ» агентлыгы яза.
Мәгълүматлар Россия Китап палатасы тарафыннан тәкъдим ителгән. «Китап» нәшриятында дөнья күргән китапларның гомуми тиражы 609,46 мең данә тәшкил иткән.
«Узган ел бездә 151 исемдә китап чыкты, бүләк басмалары да бик күп булды. Шулай ук Россия һәм төбәк дәрәҗәсендәге 16 бүләк алдык, инде икенче ел рәттән «Башкортстанның иң яхшы йөз товары» һәм «Россиянең иң яхшы товарлары» билгеләренә ия булдык. Башкорт китаплары белән республикадан читтә дә кызыксыналар - маркетплейсларга чыккач, сатуларның кискен артуы күзәтелде - безнең басмалар Казахстанга, Белоруссиягә һәм башка илләргә җибәрелде», - диде республика нәшрияты директоры вазифаларын вакытлыча башкаручы Эльмира Хәйретдинова.
Ул билгеләп үткәнчә, нәшрият 30 майдан 1 июньгә кадәр Уфаның Совет мәйданында узачак III «Китап бәйрәме» Халыкара китап ярминкәсе кысаларында бик күп кызыклы чаралар планлаштыра.