Трамп Ресейге қарсы санкцияларды тағы бір жылға ұзартты
АҚШ президенті Дональд Трамп Ресей билігінің "зиянды әрекеттеріне" байланысты төтенше жағдай режимін тағы бір жылға ұзартты, - деп хабарлайды Tengrinews.kz тілшісі РБК-ға сілтеме жасап.
Басылым елдің Федералды реестріндегі деректерді келтірді.
"Бұл Ресейдің активтерін бұғаттауды және санкцияларды, сондай-ақ Ресейдің әскери-өнеркәсіптік кешенімен (ВПК) жұмыс істейтін шетелдік қаржы институттарына қатысты екінші деңгейлі шектеулерді ұзартуды білдіреді", – делінген материалда.
"Зиянды әрекеттер" қатарына "АҚШ-та және оның одақтастарында еркін сайлау өткізуге кедергі келтіру", киберқылмыстар, "шетелдік үкіметтерге ықпал ету үшін трансұлттық сыбайлас жемқорлықты ынталандыру және пайдалану", диссиденттер мен журналистерге қысым, Вашингтон үшін стратегиялық аймақтардағы қауіпсіздікке нұқсан келтіру және халықаралық құқық қағидаттарын бұзу жатады.
"Ресей Федерациясы үкіметінің нақты зиянды әрекеттері... АҚШ-тың ұлттық қауіпсіздігіне, сыртқы саясатына және экономикасына төтенше қауіп төндіруді жалғастырып отыр, – делінген құжатта. – Мен 14024-атқарушы жарлықпен жарияланған елдегі төтенше жағдай режимін тағы бір жылға ұзартамын".
Айта кетейік, бұл режимді оның алдындағы президент Джо Байден 2021 жылғы 15 сәуірде енгізген болатын. Сол кезде Байден Конгреске Мәскеуден төнетін "төтенше қауіпке" байланысты Ресейдің жеке және заңды тұлғаларына қарсы санкциялар туралы жарлыққа қол қойғанын хабарлаған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!