Դատական համակարգը պետք է կախված չլինի ոչ միայն կառավարությունից, այլև «այլ տեղերից»․ Նիկոլ Փաշինյան
Կառավարությունը նախատեսում է 2024 թվականի հուլիսի մեկից Հանրային պաշտպանի գրասենյակին լրացուցիչ 15 հաստիք ավելացնել։
Կառավարության նիստում վարչապետ Նիկոլ Փաշինյանը նշեց, որ ԵԽԽՎ-ն բարձր է գնահատել դատական համակարգի անկախության պահպանմանն ուղղված բարեփոխումները, որոնք իրականացնում է Հայաստանը։ Նա ասաց, որ, իհարկե, նշվել է նաև մի շարք մարտահրավերների մասին, այդ խնդիրների մասին ևս գիտեն։
«Մեր կամքն է, որ մենք հետևողական և անարգել գնանք ՀՀ դատական համակարգն իրական անկախությամբ ապահովելու ճանապարհով։ Կարծում եմ՝ անկախությունն ու արդար դատաքննության իրավունքի հասանելիությունն ապահովելու իմաստով Հանրային պաշտպանի ինստիտուտի ուժեղացումը շատ կարևոր է, ունենք պատկերացումներ, որոնք հետևողականորեն կյանքի ենք կոչելու»,- նշեց նա։
Ըստ Փաշինյանի` դատական համակարգի անկախության հետ կապված մարտահրավերը 2018 թվականից եղել ու շարունակում է մնալ նույնը՝ պետք է կենտրոնացած մնալ այդ մարտահրավերների վրա։
«Մենք ասել ենք, որ դատական համակարգը պետք է կախվածություն չունենա, բայց կախվածություն չունենա ոչ միայն կառավարությունից, այլև կախվածություն չունենա հնարավոր այլ տեղերից, որոնցից սովորաբար կամ ավանդաբար ունենում է կախվածություն։ Դատական համակարգում հակակոռուպցիոն քաղաքականության ակտիվ իրագործումը չափազանց կարևոր է։ Մենք պետք է ի վերջո արձանագրենք, որ մեկ կամ երկու նույնիսկ չորս քայլով մեր նպատակին չենք հասնի։ Իմ համոզմունքն այն է, որ, որպես կանոն, բարեփոխումները երբեք չպետք է դադարեն»,- ասաց վարչապետը։