Մեզ սպասվում է ոչ շատ շոգ և տեղումնառատ հուլիս. Գագիկ Սուրենյան
Հուլիսին ևս հանրապետության տարածքում սպասվում են տեղումներ։ Այս մասին իր ֆեյսբուքյան էջում հայընել է «Հիդրոօդերևութաբանության և մոնիթորինգի կենտրոն» ՊՈԱԿ–ի տնօրենի տեղակալ Գագիկ Սուրենյանը։
«ՇՄՆ «Հայհիդրոմետ» ՊՈԱԿ-ը տեղեկացնում է`հուլիսին օդի ամսական միջին ջերմաստիճանը հանրապետության ողջ տարածքում կանխատեսվում է նորմայից բարձր 1 աստիճանով, տեղումների քանակը նորմայից զգալի ավել։ Մեզ սպասվում է ոչ շատ շոգ և տեղումնառատ հուլիս», - գրել է նա։
Ավելի վաղ Սուրենյանը հայտնել էր, որ անցած գիշեր Արարատի մարզում, Արարատ-Ուրցաձոր հատվածում 2 ժամում թափվել է ամբողջ հուլիս ամսվա տեղումների նորմային հավասար անձրև։
Ինչ վերաբերում է առաջիկա օրերի եղանակի կանխատեսումներին, ապա «Հիդրոօդերևութաբանության և մոնիթորինգի կենտրոն» ՊՈԱԿ–ի փոխանցմամբ՝ Երևանում հուլիսի 1-ի ցերեկը, 2-3-ին սպասվում է կարճատև անձրև և ամպրոպ, հուլիսի 1-2-ին քաղաքի առանձին հատվածներում՝ հորդառատ անձրև, իսկ հուլիսի 4-6-ին՝ առանց տեղումների եղանակ։ Ամպրոպի ժամանակ սպասվում է քամու ուժգնացում՝ 18-23մ/վ։
Մարզերում հուլիսի 1-ի ցերեկը, 2-3-ին շրջանների զգալի մասում, 6-ին կեսօրից հետո առանձին շրջաններում սպասվում է անձրև և ամպրոպ, առանձին հատվածներում նաև կարկուտ։ Հուլիսի 1-2-ին առանձին հատվածներում անձրևները կլինեն հորդառատ։ Հուլիսի 4-5-ին սպասվում է առանց տեղումների եղանակ։
Քամին՝ հյուսիս-արևելյան՝ 2-5մ/վ, ամպրոպի ժամանակ սպասվում է քամու ուժգնացում` 19-24մ/վ արագությամբ:
Օդի ջերմաստիճանը հուլիսի 3-5-ին աստիճանաբար կբարձրանա 5-7, Լոռիում, Տավուշում և Սյունիքում՝ 10-12 աստիճանով: