«Бавария» Боейни қишда сотиш эҳтимолини инкор этмади

Мюнхеннинг «Бавария» клуби ўнг қанот ҳимоячиси Саша Боей қишки трансфер ойнасида жамоадан кетиши мумкин. Бу ҳақда euro-football.ru хабар беради.

25 ёшли футболчи асосий таркибда мунтазам ўйнай олмаяпти. Клуб спорт бўлими раҳбари Макс Эберл январда франсуз легионер билан хайрлашиш вариантини ҳам кўриб чиқаётганини тасдиқлади.

«Хироки [Ито] ва Фонзи [Алфонсо Дэвис] қайтди — энди бизда жуда кўп юқори савиядаги қанот ҳимоячилари бор. Шу сабаб бир-икки футболчига ўйин амалиёти топиш қийинлашиши мумкин. Эҳтимол, таркиб бўйича айрим ўзгаришларни ўйлаб кўриш мантиқий. Ҳозир 6 январ, трансфер ойнаси ёпилишига ҳали анча вақт бор», — Bayern & Germany Эберлнинг Боей келажаги ҳақидаги саволга жавобини келтиради.

Аввалроқ латералга «Кристал Пэлас» ва «Галатасарай» қизиқиш билдираётгани ҳақида хабарлар тарқалган. Transfermarkt портали Боейни 15 млн еврога баҳоламоқда.