«Килмейс» стадионни янгилаш учун мухлислардан ёрдам сўрамоқда
Аргентинанинг энг қадимги клубларидан бири ҳисобланган «Килмейс» (1887 йилда ташкил топган) кўп йиллик тарихи сабаб катта мухлислар армиясига эга. Бироқ ҳозир жамоа оғир даврни бошдан кечирмоқда ва қўллаб-қувватлашга муҳтож. Бу ҳақда euro-football.ru хабар беради.
Клуб раҳбарияти стадионни қайта қуриш режасини эълон қилиб, мухлисларга ноодатий таклиф билан чиқди: гап пул йиғиш ҳақида эмас. Аксинча, ишқибозлардан эски усулда стадионга келиб, жисмонан меҳнат қилиш, майдон атрофидаги турли қайта таъмирлаш юмушларида қатнашиш сўралди.
Жанубий яримшарда жазирама ёз ҳукм сураётганига қарамай, мухлислар чақириққа ижобий муносабат билдириб, клуб илтимосига мамнуният билан жавоб берди.