«Ювентус» Спаллеттига 2028 йилгача янги шартнома таклиф қилади
Туриннинг «Ювентус» клуби бош мураббий Лучано Спаллетти билан ҳамкорлик муддатини узайтирмоқчи. Бу ҳақда euro-football.ru хабар беради.
La Gazzetta dello Sport хабарига кўра, клуб мутахассисга 2028 йил ёзигача мўлжалланган янги битимни таклиф қилмоқда. Бироқ Спаллетти ҳозирча шошилмаяпти: у раҳбариятдан трансфер бозорида мураббий истаган футболчиларни олиб бериш бўйича аниқ кафолатлар кутмоқда.
Спаллетти «Ювентус»ни 2025 йил октябр охирида қабул қилиб олган. Унинг амалдаги шартномаси 2026 йил 30 июнгача амал қилади. Ҳозирда туринликлар А Серия жадвалида бешинчи ўринда бормоқда: жамоа 22 турдан кейин 42 очко жамғарган ва пешқадам «Интер»дан 10 очко ортда қолмоқда.