Чемпионлар Лигаси финали учун янги тўп тақдим этилди

Чемпионлар Лигасида умумий босқич якунга етди. Энди навбат плей-оффга: 16 жамоа стиков раундда куч синашиб, 1/8 финал учун саккизта йўлланмани ўйнаб беради. 1/8 финалга эса умумий босқичнинг энг кучли саккиз жамоаси аллақачон тўғридан тўғри йўл олган. Бу ҳақда euro-football.ru хабар беради.

Шу орада УЕФА Чемпионлар Лигаси финали учун мўлжалланган расмий тўпни жамоатчиликка кўрсатди. Янги дизайн тўқ рангларда бўлиб, унда оқ юлдузлар акс этган. Тўп Adidas томонидан ишлаб чиқарилган.

2025/2026 йилги мавсум финал учрашуви Будапештда бўлиб ўтади. “Қулоқли” соврин учун ҳал қилувчи беллашув 30 май, шанба куни ташкил этилади.

Ҳозирги амалдаги чемпион — ПСЖ. Ўтган финалда парижликлар “Интер”ни 5:0 ҳисобида йирик мағлуб этиб, кубокни қўлга киритган.