Аазар Моуриньо билан машғулотлар унутилмас бўлганини айтди

Лондоннинг «Челси» клуби собиқ футболчиси Эден Аазар Жозе Моуриньо қўл остида ишлаган даврида нималарни ўрганганини сўзлаб берди. Бу ҳақда euro-football.ru хабар беради.

Аазарнинг таъкидлашича, у португалиялик мутахассисдан жуда кўп жиҳатларни олган: футболга бўлган эҳтироси, футболчиларга ишонч билдириши ва машғулот жараёнини юқори даражада ташкил қилиши айниқса ёдда қолган. «У билан қандай шуғулланганимиз ақл бовар қилмас даражада эди», деди Аазар The Guardian нашрига берган интервьюсида.

Эден Аазар «Челси» сафида 2012–2019 йилларда тўп сурган. Шундан сўнг белгиялик футболчи «Реал»га кўчиб ўтган, бироқ Мадрид клубида кутилган даражада ўзини кўрсата олмаган. 32 ёшида у футболчилик фаолиятини якунлашга қарор қилганини эълон қилганди.

Ҳозирда Жозе Моуриньо «Бенфика»ни бошқармоқда. Сешанба, 17 февраль куни лиссабонликлар Чемпионлар лигасида ўз майдонида «Реал»га қарши баҳс ўтказади.