Вальверде Престианни билан можарога изоҳ берди

Мадриднинг «Реал» клуби ярим ҳимоячиси Федерико Вальверде Винисиус Жуниорга нисбатан юзага келган ирқчилик можароси ва унда «Бенфика» футболчиси Жанлука Престианни тилга олингани ҳақида фикр билдирди. Бу ҳақда euro-football.ru хабар беради.

Учрашув давомида «қаймоқранглилар» ҳужумчиси ҳакамга аргентиналик вингер томонидан ҳақоратли сўзлар айтилганини маълум қилган. Бироқ 20 ёшли футболчининг айбини исботлаш осон бўлмаслиги мумкин, чунки у гапираётганда лабини футболкаси билан беркитиб олгани айтилмоқда.

Вальверденинг таъкидлашича, оғзини беркитиб гапириш кўпинча жирканч гап айтилаётганидан дарак беради. У Престианни ҳеч қачон ишлатилмаслиги керак бўлган сўзни айтганини, бу эса жуда пасткаш ва ачинарли ҳолат эканини қайд этди. Вальверденинг сўзларини журналист Фабритсио Романо келтирди.

Ўйинда «Реал» 1:0 ҳисобида ғалаба қозонди. Ягона гол муаллифи эса айнан Винисиус Жуниор бўлди.