«Байер» Леон Горецкани таркибига қўшиб олмоқчи, у АПЛни хоҳлайди

Мюнхеннинг «Бавария» клуби ярим ҳимоячиси Леон Горецка Леверкузеннинг «Байер» жамоаси эътиборини тортди. «Фармацевтлар» 31 ёшли футболчини марказий чизиқда аввал Гранит Жака бажарган етакчи рол учун муносиб номзод деб билмоқда. Бу ҳақда euro-football.ru хабар беради.

Манбага кўра, леверкузенликлар аллақачон Горецканинг вакиллари билан алоқага чиққан. Футболчи бу вариантни қатъиян рад этмаган бўлса-да, унинг устувор танлови Англия Премьер-лигасига кўчиб ўтиш бўлиб турибди. Қишда унга Лондоннинг «Тоттенҳэм» ва «Арсенал» клублари қизиқиш билдирганди.

Эслатиб ўтамиз, Горецка жорий мавсум якунида эркин агентга айланади: амалдаги шартнома узайтирилмайди. У «Бавария» сафида 2018 йилдан буён тўп суриб келмоқда.