Нобоа «Рубин» «Барселона»ни енгганида катта бонус олганини айтди

2009 йил октябрида Қозоннинг «Рубин» клуби Чемпионлар лигасида шов-шувли натижа қайд этиб, «Камп Ноу»да «Барселона»ни 2:1 ҳисобида мағлуб этганди. Ўша учрашувдан кейинги мукофот пули ҳақида жамоанинг собиқ футболчиси Кристиан Нобоа эслаб ўтди. Бу ҳақда euro-football.ru хабар беради.

Нобоа сўзларига кўра, бу унинг фаолиятидаги энг йирик премияси бўлган: ҳар бир футболчига 80 минг доллардан берилган. Бу ҳақда у «Спорт-Экспресс»га айтиб ўтган.

Ярим ҳимоячи ўша маблағга ҳеч нарса харид қилмаганини, аксинча, кейинроқ учун жамғариб қўйганини таъкидлади. Унинг айтишича, ўшанда ҳам анча мулоҳазали йигит бўлган.

Эслатиб ўтамиз, 2009/2010 йилги Чемпионлар лигаси гуруҳ босқичида «Рубин» ўз квартетида учинчи ўринни эгаллаган. Гуруҳда «Барселона» ва «Интер» юқорироқда якунлаган бўлса, Киевнинг «Динамо»си энг паст поғонада қолган.