Галйардо кўз ёш билан хайрлашди: “Ривер”дан кетиш йўқ

Марсело Галйардо мураббий сифатида сўнгги ўйинини “Банфилд”га қарши ўтказди ва “Ривер Плейт” ниҳоят 3:1 ҳисобида ғалаба қозониб, уч учрашувдан иборат мағлубиятлар сериясига нуқта қўйди. Бу ҳақда euro-football.ru хабар беради.

Айнан шу омадсиз кетма-кетлик Галйардонинг лавозими билан хайрлашишига сабаб бўлди, бироқ клуб унга муносиб тарзда кетиш имконини берди. У эса бу саҳнани ҳақиқий драма даражасига олиб чиқди.

Учрашувдан сўнг кўз ёшларини яширмаган Галйардо мухлисларга миннатдорлик билдириб шундай деди: “Ҳаммангизга шунчаки раҳмат. Сизнинг меҳрингизни сўз билан ифодалаш қийин. Мен бутунлай кетмайапман. “Ривер”дан ҳеч ким абадий кетмайди. Бу сеҳрли жой: ҳатто кетганингда ҳам барибир клуб билан қоласан”.

Эслатиб ўтамиз, Галйардо 1990-йилларда “Ривер Плейт” сафида ҳам, Аргентина терма жамоасида ҳам тўп сурган.