«Авыру хатынны ире карый иде». Фатирда ир белән хатын мәете табылган
Ульяновск шәһәрендәге бер фатирда ир белән хатын мәете табылган. Бу турыда Ulpravda.ru яза.
29 гыйнварда Ленин районындагы йортта 71 яшьлек ир-ат һәм 66 яшьлек хатын-кыз мәете табыла. Хатын деменция белән авырый, аның бот сөяге сынган, шуңа күрә ятып кына тора. Хатынны ире тәрбияли. Ир-ат та хәле начар булуга зарланган.
Бер версия буенча, башта ире вафат булган, аннары үзенә ярдәм итә алмый торган хатын да үлгән. Мәетләрне туганнары тапкан.
«Якынча версия буенча, аларның үлемендә криминал юк. Мәетләрне яру билгеләнгән. Тикшерү бара», – дигәннәр Тикшерү комитетында.