«Өйләнешергә җыенганнар». 13 яшьлек кызны мәктәп яныннан урлап алып киткәннәр

Төмән өлкәсенең Княжево авылында 13 яшьлек кызны урлаганнар. Урлаучы егет бу балага өйләнергә теләгән. Бу турыда РЕН ТВ яза.

Укучы кызны 30 гыйнварда мәктәп капкасы яныннан урлап алып киткәннәр. Аннары аны өеннән 1 мең километр ераклыкта – Саратов өлкәсендә табалар.

Ачыкланганча, билгесез затлар балигъ булмаган яшьтәге кызны машинага утыртып, билгесез юнәлештә алып китә. Хәзер аны алып китүчеләр ачыкланган, аларны Төмәнгә алып килгәннәр. Үсмер кызны ата-анасына тапшырганнар. Төмән өлкәсе буенча Тикшерү идарәсе шул хакта хәбәр иткән.

Тикшерү версиясе буенча, үсмер кыз Волгоград өлкәсендә яшәүче малай белән романтик хатлар языша, үзенә 16 яшь дип әйтә. Егет исә ата-анасына хәбәр итеп тормыйча, өйдән 40 мең сум акча ала да, таксига утырып, кыз артыннан китә – үсмер малай бу кызга өйләнергә тели. Алар икесе дә үз теләге белән Волгоград өлкәсендә никахлашырга җыена.

«Үсмер малайның ата-анасы бу турыда белгәч, тиз арада машиналарына утырып, Саратов өлкәсенә китәләр. Алар кызның яше турында ялганлавын белгәч, аны үзенең өенә кайтарырга тели, ләкин аларны юлда ЮХИДИ туктата. Полиция хезмәткәрләре аларны алдан таратылган ориентировка буенча таный. Тикшерүчеләр ачыклаганча, балага карата хокук боза торган гамәлләр кылмаганнар. Кызны ата-анасына кайтарып биргәннәр», – диелә.

Җинаять эшен тикшерү бара.