Балык Бистәсе район судына яңа рәис билгеләнде
Россия Федерациясе Президенты Указы нигезендә Балык бистәсе район суды рәисе вазыйфасына Марс Наил улы Миндубаев билгеләнде.
11 ноябрь көннеТатарстан Республикасы Югары суды рәисе Илгиз Идрис улы Гыйлазов Марс Наил улы Миндубаевны район суды коллективына тәкъдим итте.
-Марс Наилевич алдында торган бурычлар шактый катлаулы: район судында яшәп килгән күркәм традицияләрне сакларга, коллективны нәтиҗәле эшкә тагын да ныграк берләштерегә, хезмәт шартларын яхшыртырга кирәк булачак. Аның бай тәҗрибәсе әлеге бурычларны уңышлы үтәргә мөмкинлек бирер, дип ышанабыз,- диде ул.
Тантанада Татарстан Республикасы Суд департаменты Идарәсе начальнигы Җәүдәт Салихов, Балык бистәсе муниципаль район башлыгы Илһам Валеев, район прокуроры Руслан Шакирҗанов, эчке эшләр бүлеге начальнигы Наил Мостафин һәм башка хокук саклау органнары вәкилләре катнашты.
Бу көнне Илгиз Гыйлазов Балык Бистәсе район судын 2006-2012 елларда җитәкләгән Вәкил Мөхәммәтгалиевка, район суды судьясы Әлфия Минәхмәтовага “150 лет судебной реформе в России” медальләре тапшырды.
Безнең белешмә:
Марс Наил улы Миндубаев 1965 елда Үзбәкстан ССРның Әндиҗан өлкәсе Кургантепа районы Кургантепа поселогында туа.
1990 елда Караганда дәүләт университетының юридик факультетын тәмамлый.
1991-1995 елларда эчке эшләр органнарында хезмәт итә.
1995 елдан 2005 елга кадәр Менделеев районы прокуратурасында,Казан шәһәренең Мәскәү район прокуратурасында, Казан шәһәре прокуратурасында өлкән тикшерүче; Вахитов районы прокуратурасында прокурор- криминалист, Татарстан Республикасы Прокуратурасында бүлек прокуроры булып эшли.
2006-2008 елларда Марий Эл республикасы прокуратурасының Волжск районара прокуроры ярдәмчесе вазыйфаларын башкара.
2008-2012 елларда Алабуга районы, Алабуга шәһәре суд участогының җәмәгать судьясы вазыйфаларын башкара.
2013 елдан Татарстан Республикасы Югары Суды судьясы.
Марс Миндубаев дүртенче квалификацион класслы судья, юстиция киңәшчесе.
Әзерләде Илгиз Җамалиев.
Автор фотосы.