Машинасы су төбенә киткән
Ял көннәренең берсендә төнлә Кама елгасында боз өстеннән автомобильдә җилдерергә теләгән татарстанлы чак кына исән кала.
Ир-атның җиңел акыллы бу адымы чак кына фаҗига белән тәмамланмый кала. Ул ВАЗ-2108 автомобиле белән боз өстеннән йөри. Чираттагы тапкыр кергәндә автомобильнең арткы тәгәрмәчләре астында боз чатнап ярыла. Суга батып баручы машинасыннан көчкә чыгып котылган ир МЧСка шалтыратырга тели, әмма телефонында зарядкасы беткән була. Ул өенә кайтып китә.
Икенче көнне коткаручылар 16 метр тирәнлектән автомобильне тартып чыгаралар. Хуҗа дүрт тәгәрмәчле дустын язга кадәр гаражында сакларга карар иткән.