Зәйдә Якты Күл авылы мәктәбендә “түгәрәк өстәл” утырышы узды

Зәй мәгариф идарәсе 2009-2015 елларга кабул ителгән “Гражданин шәхесен формалаштыру” муниципаль программасы үтәлешен тикшерү максатында, мәктәпләргә чыгып, “түгәрәк өстәл” артында сөйләшүләрне дәвам итә. Чираттагы шундый кызыклы очрашу Якты Күл авылы мәктәбендә узды. Анда укучыларның “Кладовая природы” мәктәп проекты буенча файдалы җимешләр, дару үләннәре турында өйрәнеп, аларны үз бакчаларында үстерүләре югары бәяләнде. Шулай ук балаларның балчыктан ясалган тәлинкәләргә рәсемнәр төшерү буенча мастер-класслар күрсәтүе, туган як турында өйрәнүгә мәктәптә зур игътибар бирелү башкаларга да үрнәк итеп күрсәтелде. Сөйләшүләр барышында укыту-тәрбия эшләренә кайбер юнәлешләр бирелде.