Зәй пенсия фонды хезмәткәре иҗат конкурсы җиңүчесе

Зәй районы пенсия фонды идарәсе хезмәткәрләре эшләп кенә калмый, ә иҗади конкурсларында да катнаша. Шундый конкурс быел Россия пенсия фонды оешуның 24 еллыгына багышлап үткәрелде. Ул 2014 елның 25 августыннан 20 декабренә кадәр барды һәм түбәндәге номинацияләрдә үткәрелде:

– вокал (халык, классик, эстрада җырлары);

– башкару осталыгы;

– хореография;

– оригиналь жанр;

– нәфис сүз.

Республика пенсия фонды идарәләре арасында Зәйдән пенсия билгеләү һәм түләү бүлеге белгече Светлана Овчаркина “Хореография” номинациясендә – I урын, “Нәфис сүз” номинациясендә призлар алды. Конкурсның финалы 2014 ел ахырында Казанда узды.

Җиңүчеләргә Дипломнар һәм кыйммәтле бүләкләрне РФ пенсия фондының Татарстан Республикасы буенча бүлеге идарәчесе Марсель Имамов тапшырды.