Иранда ишембидеги футбол матчына аялдар да бара алды

Тегеранда Азия Чемпиондор Лигасынын финалына жүздөгөн кыз-келин ышкыбоздорго да барууга уруксат берилди. Бул тууралуу жергиликтүү маалымат каражаттары жазышты. 10-ноябрда Иран баш калаасынын “Персеполис” жана жапониялык “Кашима Антлерс” клубдарынын беттешүүсү өткөн “Азади” стадионуна негизинен оюнчулардын жакындары, аялдар командасынын мүчөлөрү, футбол федерациясынын кызматкерлери барышты. Матч 0-0 эсебинде аяктады, бирок биринчи оюнда жапониялыктар уткандыктан, чемпиондук наам аларга тийди.


Реформачыл "Sazandegi" гезити баш бетине стадиондогу аял-ышкыбоздордун сүрөттөрүн чыгарып, “Азия Чемпиондор Лигасынын финалын ирандык аялдар жеңди” деп жазды.


Беттешүүгө катышкан ФИФАнын төрагасы Жанни Инфантино “бул – футбол үчүн тарыхый жана кубанычтуу күн болду, чыныгы бурулуштун күнү”, - деп билдирди.


Иранда 1979-жылкы Ислам революциясынан бери аялдарга стадиондорго барып футбол көрүүгө жол берилбейт. ФИФА бул чектөөнү алдыруунун үстүнөн иштеп келатат.