Орусия: Өспүрүмдөрдү каршылык акцияларына тарткандар жазаланат

Орусиянын Мамлекеттик думасы 18-декабрда жашы жете электерди  каршылык акцияларына тарткандар үчүн жаза камтыган мыйзам долбоорду үчүнчү окууда кабыл алды. 


Документте өспүрүмдөрдү акцияга катышууга чакырган уюштуруучуларга 50 миң рублга чейин айыппул салуу, он беш күнгө чейин камакка алуу каралган.  


Мыйзам долбоор оппозициялык саясатчы Алексей Навальныйдын коррупцияга каршы митингдеринен кийин Мамлекеттик думага киргизилген. Байкоочулар бул митингдерге өспүрүмдөр көп катышканын билдиришкен.


Быйыл февралда орус президенти Владимир Путин Ички иштер министрлигине жаштарды уруксат берилбеген акцияга тартууга аракеттенген топтордун ишине бөгөт коюуну тапшырган.