Անհավանական եմ համարում, որ ներկայիս իշխանությունները բանակցում են տարածքների հանձման շուրջ. Ռուբեն Մեհրաբյան
ԼՂ կարգավորման գործընթացում լուրջ փոփոխություններ տեսնում ենք: Լրագրողների հետ հանդիպմանն ասաց Միջազգային անվտանգության հարցերով հայկական ինստիտուտի փորձագետ, քաղաքական վերլուծաբան Ռուբեն Մեհրաբյանը:
«Աննախադեպ հանդարտ է սահմանում, ուղիղ կապ կա Երևան-Բաքու, որը ԵԱՀԿ հովանու ներքո է կազմակերպված: Մենք թևակոխել ենք բանակցային գործընթացի ակտիվ փուլ, մի քանի փոփոխություններ էլ կան դիմակայության գծի վրա,- ասաց նա՝ մատնանշելով ՀՀ-Ադրբեջան հյուսիսարևեյան դիմակայության գծի վրա ադրբեջանական ցամաքային զորքերի փոխարեն սահմանապահ ուժերի տեղակայումը,- Բաքվին ձեռնտու է խաղաղասիրական դիրքավորումը արցախյան բանակցային գործընթացում, այս փոխատեղումը կսկսի վաճառել որպես խաղաղասիրություն: Բայց այդ զորքերը կարող են գործի դրվել մեկ այլ տեղում, երբ իրենք հարկ կհամարեն»:
Այս համատեքստում նա հիշատակեց ՊՆ փոխնախարարի հայտարարությունը, որ, այնուամենայնիվ չպետք է թուլացնենք մեր զգոնությունը:
Անդրադառնալով Ադրբեջանի արտգործնախարար Էլմար Մամեդյարովի հայտարարությանը, թե Հայաստանի իր գործընկերոջ հետ փոխըմբռնման են հասել, նա դժվարացավ ասել, թե ինչի մասին է ակնարկ արվում:
«Այս ակտիվ գործընթացի ընթացքում նման հայտարարությունները ինչ-որ տեղ կարող են հիմք դառնալ օպտիմիզմի համար, բայց շատ զգուշավոր, սահմանափակ օպտիմիզմի համար, որովհետև չպետք է մոռանանք, որ Ադրբեջանը մնում է իր դիրքորոշմանը»,- ասաց նա՝ հիշատակելով, որ Ադրբեջանը ցանկանում է մինչ արցախյան պատերազմը ստատուս քվոն:
Բայց այնուամենայնիվ, ըստ նրա, եթե արտգործնախարները դրական նոտաներ են բարձրաձայնում, արդեն լավ է: «Դա ավելի լավ է, քան հայտարարությունների մակարդակով փոխհրաձգությունը»,- ասաց նա:
Նրա խոսքով՝ այդ ամենի հետ մեկտեղ չպետք է մոռանալ, որ Արցախի տարածքները միշտ էլ մնում են վտանգված, և այդ վտանգի չեզոքացման միակ գրավականը Արցախի պաշտպանության բանակը և հայ զինվորն են:
Անդրադառնալով Բելառուսի նախագահ Ալեքսանդր Լուկաշենկոյի հայտարարությանը՝ Արցախի տարածքները հանձնելու առաջարկի մասին, քաղաքական վերլուծաբանը նշեց, որ փաստացի ներկայացվեց, որ Մոսկվան և Մինսկը՝ դուետով անպարկեշտ առաջարկություններ են արել Հայաստանին, իսկ Սերժ Սարգսյանը չի ընդունել դրանք:
«Լուկաշենկոն փաստորեն միանում է Բաքվի և Անկարայի հռետորաբանությանը՝ ընդդեմ ԵԱՀԿ ինսկի խմբի»,- նկատեց նա:
Tert.am-ի դիտարկմանը, թե վերջին շրջանում՝ ակտիվացել են քննարկումներն այն մասին, որ ներկայիս իշխանությունները բանակցություններ են վարում տարածքների հանձման շուրջ, ինքը որքանո՞վ է դա հավանական համարում, Ռուբեն Մեհրաբյանն արձագանքեց. «Ես համարում եմ անհավանական, որ ներկայիս իշխանությունները բանակցում են տարածքների հանձման շուրջ: Դրանից հետո կլինի կատաստրոֆա, որովհետև Արցախի կարգավիճակի հարցը լուծված չէ: Այդպես չի լուծվում հարցը, թե ՀՀ-ն ի՞նչ է ստանալու: Մենք ունենք մեկ խնդիր՝ բոլորն ընտելանան, որ կա երկու հայկական պետություն»: