Veseli: BE-ja t’i trajtojë barabartë Kosovën dhe Serbinë
Veseli, në një konferencë për media, tha se rruga e Kosovës drejt Bashkimit Evropian, nuk ka kaluar dhe nuk do të kalojë nga Serbia.
"Kemi pritur reflektim të balancues të Bashkimit Evropian për këtë situatë, por nuk kemi pritur që Bashkimi Evropian të reagojë vetëm ndaj nesh. Kjo mungesë balance e BE-së, te qytetarët e Kosovës me të drejtë ka krijuar përshtypjen e njëanshmërisë së BE-së”, tha Veseli.
“Thirrjet e Serbisë për heqjen e taksës dhe përsëritja e tyre nga BE-ja pa i bërë thirrje edhe Serbie që të heqë dorë nga qasja e saj bllokuese ndaj Kosovës, po shqetëson me të drejtë qytetarët e Kosovës. Kosova nuk do të veprojë njëanshëm në heqjen e taksës”, u shpreh Veseli.
Ai tha se bllokimi i qytetarëve të Kosovës pa lëvizje të lirë vetëm sa e vështirëson edhe me shumë ketë situatë.
“Bashkimi Evropian nuk mund ta shikojë Kosovën nga perspektiva integruese e Serbisë. Ne presim që Bashkësia Evropian në dialog të garantojë parimin e barabartë të të dyja palëve dhe përfitimet e dyanshme të tij. Trajtimi i barabartë dhe reciprok janë rrugëzgjidhja”, tha Veseli.
Qeveria e Kosovës më 21 nëntor vendosi taksën prej 100 për qind ndaj produkteve që janë me origjinë nga Serbia dhe Bosnjë dhe Hercegovina. Ndonëse kjo masë është kritikuar nga Bashkimi Evropian dhe është kërkuar që të hiqet, kryeministri i Kosovës, Ramush Haradinaj ka thënë se taksa do të hiqet kur Serbia ta njohë Kosovën.