Германия: Карантинди четке каккандар Касселде полиция менен кагылышты
Германиянын Кассел шаарында “COVID» илдетине каршы карантинге нааразы болгон демонстранттардын айрым топторунун кол салуусуна жооп катары полиция желим таяктарды, көздөн жаш чыгаруучу газды жана суу замбирегин колдонду. Шаардагы нааразылык жыйынына 20 миңдей киши катышты, алардын көпчүлүгү беткапсыз жүрүштү. Быйылкы Токио Олимпиадасына чет өлкөлүк көрүүчүлөр катыштырылбайт. 21-марттын таңына карата коронавируска байланыштуу ушул жана башка чакан кабарлар топтому.
Германия бийликтеринин коронавирустун жайылышына каршы карантиндик чараларына нааразы болгон калайыктын бөлүгү 20-мартта Гессен жергесиндеги Кассел шаарында ири нааразылык жыйынын уюштурду.
Полициянын айтымында, жыйын маалында кайсы бир учурда нааразылык жыйынынын катышуучуларынын айрым топтору тартип сактоо күчтөрүнүн өкүлдөрүнө кол сала башташты. Полициячылар тартип сактоочулардын катарын жарып өтүүгө далаалат кылгандарга каршы желим таяк колдонуп, көздөн жаш агызуучу газ жана суу чачып жооп беришти.
Полиция бир катар кишилер кармалгандыгы тууралуу кабарлаган менен, алардын так санын билдирген жок. Тартипти сактоо үчүн бул аймакка Рейнланд-Пфальц, Түндүк Рейн-Вестфалия жана Тюрингия жергелеринен кошумча коопсуздук күчтөрү жөнөтүлдү.
Буга чейин Кассел шаарынын бийлиги коронавирус жаңы күч менен жайылып жаткандыгына байланыштуу жыйналыштарга тыюу салган. Бирок Гессен жергесинин жарандык соту 19-мартта жалпы 6000 кишиге эки башка аянтта демонстрация өткөрүүгө уруксат берген.
Полициянын эсебинде, нааразылык жыйынынын катышуучуларынын саны 20 миңдей киши болду. Жыйынга катышкандардын көпчүлүгү беткапсыз жүрдү жана бири-биринен бир жарым метрдей жакын аралыкта болушту.
Германиянын басма сөз агенттигинин (DPA) маалымдашынча, Кассел шаарында карантиндин зарылдыгын талап кылган атаандаш жыйын да өткөн. Бул жыйындын катышуучулары менен карантинге каршы чыккандар өз ар мушташкан учурлар да катталды. Бул атаандаш жыйындарды чагылдырып жүргөн айрым журналисттерди карнатинге каршы чыккандар жулмалаган окуялар да орун алды.
Германияда ар кандай топтор өлкөнүн ар кыл шаарларында карантин эрежелерине каршы нааразылык чараларын өткөрүүгө калайыкты чакырышты. Бул топтордун басымдуу бөлүгүн бийликтин ашынган оңчул канатынын өкүлдөрү түздү.
Борбор шаар Берлинде полиция катышуучулар беткап тагынбады жана карантиндик аралыкты сактоо эрежелерин бузду деп бир митингди таркатууга жетишти. Берлиндин бийлиги Бранденбург дарбазасына жакын жерде ири нааразылык жыйыны өтүшү ыктымал деп камынган, бирок ал жерге болгону 500дөй гана киши чогулгандыгы маалымдалды.
Германияда бул илдетке чалдыккандардын жалпы саны 2,64 миллионго жетти, анын 74,5 миңи кайтыш болду. Ал эми 2,4 миллиондон ашык бейтап айыгып кетти.
Германиянын канцлери Ангела Меркел жугуштуу оорунун андан ары тездеп жайылып жатышынын айынан өлкөдө карантиндик чектөөлөр азырынча жеңилдетилбейт деп 19-мартта билдирген.
Башка кабарлар
Евробиримдикке мүчө өлкө Нидерланддардын Амстердам шаарында 20-мартта 1000дей киши карантин чараларына каршы нааразылык жыйын уюштурду. Полиция демонстранттарга каршы суу замбирек колдонду.
Швед өлкөсүнүн үч шаарында карантин чараларына каршы чакан нааразылык жыйындар болду. ЖМК өкүлдөрүнүн айтымында, Стокгольм шаарында 200-300 киши, Мальмё шаарында – 200 киши, Гётеборг шаарында болсо 70ке чукул киши демонстрацияга чыккан.
Пакистандын премьер-министри Имран Хан коронавируска чалдыкканы тууралуу 20-мартта өлкөнүн Саламаттык сактоо министри Фейсал Султан өзүнүн «Твиттердеги» барагында кабарлады.
Фейсал Султандын айтымында, өкмөт башчысы азыр үйүндө обочо шартта дарыланууда. Эки күн мурда Имран Хан коронавируска каршы эмделген болчу.
Грекия апрелден тартып өз жарандарына коронавирусту аныктоочу жабдууну бекер сунуштамакчы.
Былтыр өтө турган Токио Олимпия оюндары быйыл 23-июлдан 8-августка чейин өтмөкчү. Бирок оюндун расмий аталышы "Токио–2020" бойдон калтырылды. Коронавирустун жайылышынын айынан бул Олимпиадага спортчулар гана катышып, чет мамлекеттик көрүүчүлөр катыштырылбай турган болду. Бул тууралуу Эл аралык Олимпиада комитетине конок ээлери маалымдашты. Андан кийин өтө турган Паралимпиада оюндарына да чет өлкөлүк көрүүчүлөр катыша албайт.
Пандемия башталгандан бери коронавирус жер жүзүндө дээрлик 123 миллион кишиде аныкталды. Алардын ичинен 2,7 миллиондон ашык киши бул илдеттин айынан кайтыш болду. Ал эми 99 миллиондон ашык киши айыгып кетти.
Дүйнө өлкөлөрү өз калкына эмдөө жүргүзүп жатышат. Оору жугузуу жана өлүм-житим көрсөткүчү боюнча алдыңкы орунда АКШ турат. Ал эми вакцина менен толук эмделген америкалыктардын саны 39 миллиондон ашты, бул – калктын 12 пайызын түзөт.