Айсулуу Тыныбекова төртүнчү ирет Азия чемпиону болду

Кыргызстандык балбан Айсулуу Тыныбекова кыз-келиндердин эркин күрөшүнөн төртүнчү жолу Азия чемпиону аталды. Мелдеш ушу тапта Казакстандын Алматы шаарында өтүп жатат.


Азия чемпиондугунда Тыныбекова 62 килограммга чейинки салмакта таймашка чыгып, финалда монголиялык Болортуей Хурелхууну 11:0 эсебинде жеңип, алтын медаль алды.


Финалга чейин Тыныбекова төрт беттеш өткөрүп, Индиядан, Казакстандан, Түштүк Кореядан жана Өзбекстандын чыккан атаандаштарын уткан.


15-апрелде Тыныбекова Биргелешкен күрөш дүйнөсү уюмуна маек куруп, жеңилүү ызасы аны жеңишке жеткиргенин белгилеген.


"Рио Олимп оюндарынан кийин мен алты ай депрессия болдум. Мен андан аябай кеч чыктым. Көп ойлонуп, талдап көрдүм. Машыктыруучум менен көп иштедик. Азыр мен ошол жети секундага абдан ыраазмын. Эгер ошол жети секунда болбогондо мен дүйнө чемпиону болмок эмесмин. Ошол жеңилүү ызасы мени кайра күчтөнтүп, мен дүйнө чемпионатынан Кыргызстандын тарыхындагы алгачкы алтын медалды утуп алдым. Жеңилүү болбосо, жеңиш болмок эмес", - деген Тыныбекова.


Айсулуу азыркы тапта дүйнө чемпиону. Ал бул наамга эки жыл мурда Нур-Султан шаарындагы чемпионатта ээ болгон.  Балбан кыз Токио жайкы Олимп оюндарына жолдомо алган. (GT)