«Ադրբեջանին ռուսական ներկայությունը խանգարում է, որպեսզի նոր պատերազմ սանձազերծի, սակայն սահմանային սադրանքներ կլինեն». Դ. Հարությունով
«Ադրբեջանական կողմը փորձում է հնարավորինս բարելավել իր դիրքերը. դա երևույթ է, որը բնորոշ է հետպատերազմական իրավիճակին»,- ԳԱԼԱ-ի հետ զրույցում նման կարծիք հայտնեց ռազմական փորձագետ Դավիթ Հարությունովը՝ անդրադառնալով այսօր Իշխանասարում տեղի ունեցած սահմանային սադրանքներին:
«Սահմանների ճշգրտման հարցում Հայաստանն ուղղակի այլընտրանք չուներ, որովհետև եթե այնպիսի պայմաններ են, և դու չես կարող շարունակել, դա նշանակում է, որ կողմերից մեկը պիտի անպայման զիջի, ինչը տեղի է ունեցել»,- նշեց ռազմական փորձագետը:
Հարությունովը չի բացառում, որ Ադրբեջանի կողմից սահմանային սադրանքները կարող են պայմանավորված լինել «Զանգեզուրի միջանցքի» վերաբերյալ Ալիևի հոխորտանքով:
Վերջինիս խոսքով՝ այդկերպ Ադրբեջանը փորձում է հոգեբանական ճնշում գործադրել Հայաստանի վրա:
«Ադրբեջանն իր հռետորաբանությունը չի փոխում, որովհետև իրենց պատկերացմամբ կան խնդիրներ, որոնք դեռևս չեն լուծվել:
Եթե պատերազմի ընթացքում խնդիր էր դրված Արցախի տարածքները գրավել, ապա այս դեպքում խոսքը գնում է հունվարի 11-ին ստորագրված փաստաթղթի մասին, ըստ որի տարածաշրջանի մեջ ձևավորվելու է աշխարհաքաղաքական և տնտեսական մոդել, և նրանք ամեն ինչ անում են, որ Հայաստանը այդտեղ լինի կրտսեր դաշնակցի դերում, և ճնշումը հիմա դրա վրա է ուղղված:
Պատերազմից հետո տարածաշրջանում նոր կոնֆիգուրացիա է ձևավորվել, և Ադրբեջանի առջև խնդիր կա, որ Հայաստանն այդ կոնֆիգուրացիայի մեջ լինի օբյեկտ, այլ ոչ թե սուբյեկտ:
Գործնականում տեսնում ենք, որ Ադրբեջանը տարբեր ձևերով փորձում է ճնշում գործադրել Հայաստանի վրա. դա եղել է հայտարարությունների տեսքով, գերիների հարցը շահարկելու տեսքով, զորավարժությունների տեսքով»,- հայտարարեց Դավիթ Հարությունովը:
Պատերազմից ամիսներ անց պաշտոնական Բաքուն չի հանդարտվել, հայտարարություններ են հնչում սպառնալիքների տեսքով: Մի քանի անգամ արդեն Ադրբեջանն իրականացրել է զորավարժություններ, արդյո՞ք նոր պատերազմի վտանգ կա:
Հարցին ի պատասխան՝ ռազմական փորձագետը հայտարարեց.
«Ադրբեջանին ռուսական ներկայությունը խանգարում է, որպեսզի նոր պատերազմ սանձազերծի: Նրանք գիտեն, որ նոր մարտական գործողությունները կնշանակի պատերազմ Ռուսաստանի հետ: Քանի այդ գործոնը կա, լայնամասշտաբ մարտական գործողությունները քիչ հավանական են, սակայն սահմանային սադրանքներ կլինեն:
Մարտական գործողությունները չեն բացառվի, եթե ռուսական գործոնի հետ ինչ-որ բան պատահի:
Բայց որ Հայաստանի անվտանգությունն այսօր Ռուսաստանն է ապահովում, դրա մասին բազմիցս ասվել է, և կարելի է ասել, որ մենք ռուսական գործոնից կախված ենք»,- եզրափակեց ռազմական փորձագետ Դավիթ Հարությունովը:
Անահիտ Չալիկյան
The post «Ադրբեջանին ռուսական ներկայությունը խանգարում է, որպեսզի նոր պատերազմ սանձազերծի, սակայն սահմանային սադրանքներ կլինեն». Դ. Հարությունով appeared first on ԳԱԼԱ.