Aqmescit: Rusiye FSBsiniñ binası ögünde tutulğanlarnıñ bir qısmı yiberildi – cemaatçılar
Aqmescitteki Rusiye FSB binası ögünde tutulıp, Pavlenko soqağındaki Jeleznodorojnıy polis bölügine ketirilgen qırımtatarlar yiberildi. Bu aqta «Qırım birdemligi» cemaat birleşmesiniñ Facebook saifesinde haber etile.
Aq qorçalayıcı ve «Qırım birdemliginiñ» faali Lutfiye Zudiyeva, polis bölüginiñ binası ögünde tutulğanlarnıñ tuvğanları ve faaller buluna, dep bildirdi.
Hatırlatamız, sentâbrniñ 4-nde Aqmescitniñ Franko soqağında Qırımdaki Rusiye FSBsiniñ idare binası ögünde Rusiye quvetçileri tahminen 40 insannı tuttı. Qırımtatar Milliy Meclisiniñ reisi Refat Çubarovnıñ bildirgenine köre, tutulğan qırımtatarlar sentâbrniñ 3-4-nde yarımadada Rusiye quvetçileri tarafından tutulğan beş qırımtatarı aqqında malümat alacaq edi. Lutfiye Zudiyevanıñ malümatına köre, tutulğanlarnıñ ekinci qısmını №3 «Merkeziy» polis bölügine alıp kettiler.
FSB, Aqmescitteki tutuvlar ya da sentâbrniñ 3-4-nde Qırımda olıp keçken tintüvler aqqında malümatnı resmiy şekilde tefsir etmey.
Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.
Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidentiniñ Qırım Muhtar Cumhuriyetindeki daimi temsilciligi qırımtatar faali Nariman Celâlnıñ tutuluvını tefsir etip, Rusiye uquq qoruyıcılarınıñ «Qırımtatar Milliy Meclisiniñ vekillerini taqip etüvnen» bağlı adımlarını takbih etti.
Ukraina Yuqarı Radasınıñ İnsan aqları vekâletlisi Lüdmila Denisova sentâbrniñ 4-nde qırımtatar faali Nariman Celâlnıñ tutuluvını Telegramda yazıp, «Rusiye FSBsiniñ hadimleri işğal etilgen Qırımda sahte davalar esasında Ukraina vatandaşlarınıñ evlerine sürip kirmege devam ete», dep ayttı.
Ukraina Tış işler naziriniñ birinci muavini Emine Ceppar Qırım.Aqiqatqa vaziyetni tefsir etip, Qırımda Rusiye quvetçileriniñ areketlerini «siyasiy basqı» dep adlandırdı.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire
Sentabrniñ 4-nde gece qırımtatar areketiniñ faali Nariman Celâl, Aqmescit rayonınıñ Biy Tanış (Pervomayskoye) köyünde saat 1:00 civarlarında Rusiye polisiniñ hadimleri Aziz Ahtemovnıñ evini tintti, soñra ise Ahtemovnı belli olmağan yerge alıp ketti, dep yazdı Facebook saifesinde.
«Qırım birdemligi» cemaat birleşmesiniñ soñki malümatına köre, Rusiye quvetçileri işğal altındaki Qırımda sentâbrniñ 3-4-nde beş insannı tutıp aldı: Aziz Ahtemov, Asan Ahtem, Nariman Celâl, Eldar Odamanov, Şevket Useinovnı.
Advokat Ayder Azamatovnıñ bildırgenine köre, Asan ve Aziz Ahtemovlarğa qarşı Rusiye Ceza kodeksiniñ 281-inci maddesiniñ 1-inci qısmına istinaden cinaiy davalar açıldı.
Nariman Celâl – qırımtatar siyasetçisi, oca, siyasetşınas ve jurnalist. 2013 senesinden başlap Qırımnıñ Rusiye tarafından işğal etilüvinden soñ Meclis faaliyeti yasaqlanğanına qadar Qırımtatar Milliy Meclis reisiniñ birinci muavini, informatsion-analitik bölüginiñ reberi.