Москвада ўлик ҳолда топилган ўзбекистонликнинг шахси аниқланди

Ташқи меҳнат миграцияси агентлигининг Москвадаги ваколатхонаси оғизга ғишт тиқиб ўлдирилган ўзбекистонликнинг шахсини аниқлади ва унинг жасадини ватанига қайтариш ҳаракатини қилмоқда. Бу ҳақда агентлик 9 сентябрь куни расман билдирди.


Маълум қилинишича, ўлик ҳолда топилган ўзбекистонлик 1990 йилда туғилгани, унинг кимлиги аниқланган. Бироқ агентлик унинг исми-шарифини ошкор этмади.


“Унинг яқин қариндошлари билан алоқа ўрнатилиб, жасадни Ўзбекистонга қайтариш бўйича тегишли ҳужжатлар расмийлаштирилмоқда”,-дейилади агентлик баёнотида.


Бундан ташқари Россиянинг ҳуқуқ-тартибот идоралари ходимлари билан алоқалар ўрнатилиб, мазкур ҳодиса назоратга олинди.


Озодлик радиоси 6 сентябрь куни Москвада оғзига ғишт тиқилган мигрантнинг жасади топилгани тўғрисида хабар берган эди.