Қозоғистон Афғонистондаги “янги ҳукумат билан алоқаларни йўлга қўйиш”га тайёрлигини билдирди

Қозоғистон президенти Қасим-Жўмарт Тоқаев хорижий давлатлар элчиларидан ишонч ёрлиқларини қабул қилиш маросимида Қозоғистоннинг Афғонистондаги вазиятга муносабатини очиқлади. Бу ҳақда президентнинг матбуот котиби Берик Уали маълум қилган.


Хусусан, Тоқаев Қозоғистон зўравонлик ёйилишининг ва наркотик моддалар савдосининг олдини олиш ва Афғонистондан миграцияни назорат қилиш мақсадида ҳамкорликка тайёрлигини билдирган.


“Қозоғистон Афғонистонни қўшнилари билан тотув яшайдиган барқарор, суверен ва яхлит давлат сифатида кўришни хоҳлайди. Биз аввало ушбу жафокаш мамлакат бошига тушган долзарб гуманитар муаммоларга ечим топиш учун янги ҳукумат билан конструктив ишчи муносабатларни йўлга қўйишга тайёрмиз”, деган Тоқаев.


Унга кўра, халқаро ҳамжамият “ушбу ҳал қилувчи паллада Афғонистонни ўз ҳолига ташлаб қўймаслиги лозим”. “Аксинча, иқтисодий ва барқарор тараққиёт ғоясини Афғонистонга оид барча келгуси режаларимизга сингдирмоғимиз керак”, деган Қозоғистон президенти.


Ўтган ҳафтада Тоқаев, видеоалоқа орқали Россиядаги иқтисодий форум йиғилишида чиқиш қиларкан, Толибон ҳаракатини тан олиш масаласи эҳтиёткорликни талаб қилишини ва БМТнинг тегишли резолюцияларига боғлиқлигини айтган.


БМТ Хавфсизлик кенгаши томонидан 2003 ва 2011 йилларда қабул қилинган икки резолюцияга кўра Толибон қонундан ташқарида деб топилган, дея урғулаганди Тоқаев.


Толибон гуруҳи Қозоғистонда Олий суднинг 2005 йил 15 мартидаги қарори билан террорчи ташкилот сифатида тақиқланган.