МЗ: 80 проценти од новите случаи со ковид се невакцинирани

Според статистика за изминативе пет недели, 20.878 граѓани, односно дури 80 отсто од позитивните на Ковид-19 не биле вакцинирани, информира Министерството за здравство. Процентот на хоспитализирани лица кои се невакцинирани изнесува 84 отсто, додека само 16 отсто од сите моментално хоспитализирани пациенти се целосно вакцинирани.


„Смртноста кај невакцинираните е драстично поголема, покажува анализата. Во период од пет седмици на територија на државата починале 678 лица со Ковид-19, од кои 591 пациент или 87 проценти не биле вакцинирани, а само 87 или 12 отсто примиле вакцина. Според анализите, починатите имале повеќе комбинирани хронични заболувања“, се вели во соопштението од ресорното министерство.



Повеќе од 600 илјади граѓани примиле две дози вакцина


Заразените и починатите се вакцинирани со вакцини што ги има на располагање кај нас, како и со „Модерна“ и „Џонсон и Џонсон“, кои некои од пациентите ги примиле во странство.Министерството за здравство укажува на важноста на вакцинација.


„Секоја вакцина која ја имаме на располагање е безбедна, ја намалува шансата од заболување, спречува тешка форма на болеста и штити од смртен исход. Министерството за здравство апелира граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКов2“, се посочува во соопштението.


Од Министерството појаснуваат дека за вакцинирани се сметаат лицата кои примиле две дози и поминале најмалку 14 дена од примање на втора доза вакцина.