Թալիբները հերքել են լուրը, որ Աֆղանստանի նոր կառավարության երդմնակալությունը սեպտեմբերի 11-ին է
«Թալիբան» շայրահեղական շարժման մշակույթի հարցերով հանձնաժողովի անդամ Ինամուլլահ Սամանղանին հայտարարել է, որ լուրերը, ըստ որոնց՝ Աֆղանստանի նոր կառավարության երդմնակալությունը տեղի է ունենալու սեպտեմբերի 11-ին՝ ԱՄՆ տեղի ունեցած ահաբեկչությունների 20-ամյա տարելիցի օրը, չեն համապատասխանում իրականությանը:
Ինչպես փոխանցում է Lenta.ru-ն, Սամանղանիի խոսքով՝ նոր կառավարության երդմնակալությունը չեղարկվել է մի քանի օր առաջ: Կառավարության մի մասը, որի կազմն ավելի վաղ հայտարարվել էր, արդեն աշխատանքի է անցել:
Աղբյուրը հիշեցնում է, որ երդմնակալության արարողությանը հրավիրված երկրների թվում էին Ռուսաստանը, Չինաստանը, Թուրքիան, Պակիստանը, Իրանը և Կատարը:
2001 թվականի սեպտեմբերի 11-ի ահաբեկչական հարձակումների ժամանակ երկու օդանավ է ուղարկվել Նյու Յորքի Համաշխարհային առևտրի կենտրոնի աշտարակների ուղղությամբ, ևս մեկ օդանավ՝ Պենտագոնի: Ահաբեկչության պատասխանատվությունը ստանձնել էր «Ալ-Քաիդա» խմբավորումը, որի դեմ պայքարի համար ԱՄՆ զորք մտցրեց Աֆղանստան: