Татарстанлылар исерек машина йөртүчеләргә ЮХИДИ телеграм-каналларында зарлана алачак
(Казан, 10 сентябрь, «Татар-информ, Полина Шевчук). Республика ЮХИДИ идарәсендә исерек машина йөртүчеләр һәм юл хәрәкәте кагыйдәләрен бозучылар турында аноним мәгълүмат алуның яңа форматы барлыкка килде. Хәзер теләгән һәркем кагыйдә бозу очраклары турында Дәүләт автоинспекциясенең Телеграм-каналында яза алачак. Мондый каналлар республиканың һәр районында булдырылган. Республика Дәүләт автоинспекциясендә «Татар-информ» агентлыгына белдерүләренчә, үзеңә кирәкле Телеграм-каналны, «ЮХИДИ» һәм район исемен җыеп, мессенджерда табарга мөмкин. «Полиция хезмәткәрләренә килгән мәгълүмат канал администраторы белән кире элемтәгә керә торган бот (аның аша кагыйдә бозу очрагын сурәтләгән фото яки видеоларны ЮХИДИ хезмәткәрләренә тапшырырга мөмкин) ярдәмендә каналга язылган башка кешеләр өчен аноним булып кала», - дип ачыклык керттеләр ведомствода.
