Саюзныя праграмы Беларусі і Расеі Лукашэнка і Пуцін зацвердзяць 4 лістапада

Саюзныя праграмы Беларусі і Расіі Лукашэнка і Пуцін зацвердзяць 4 лістапада. Пра гэта паведаміў Аляксандр Лукашэнка на сустрэчы з кіраўніком Следчага камітэта РФ Аляксандрам Бастрыкіным, перадае zerkalo.io.

«Дзесьці, па-мойму, 4 лістапада, у Дзень народнага адзінства ў Расеі, мы правядзём гэтае мерапрыемства – Вышэйшы дзяржсавет», – сказаў Аляксандр Лукашэнка.

Ён адзначыў, што на пасяджэнні плануецца зацвердзіць распрацаваныя праграмы Саюзнай дзяржавы. Напярэдадні яны былі ўзгодненыя на перамовах, а да гэтай даты будуць дашліфаваныя і прынятыя ўрадамі абедзвюх краін.

Нагадаем, 9 верасня падчас сустрэчы Лукашэнкі і Пуціна ў Крамлі былі ўзгоднены ўсе 28 саюзных праграм. У дакументах гаворка ідзе пра інтэграцыю валютных сістэм, прынцыпы збірання ўскосных падаткаў і фармавання грашова-крэдытнай палітыкі, а таксама стварэнне агульнай плацёжнай прасторы, барацьбу з тэрарызмам.

10 верасня праграмы ўхвалілі ўрады дзвюх краін на пасяджэнні ў Менску. Пасля гэтага іх павінен зацвердзіць Вышэйшы дзяржсавет Саюзнай дзяржавы.

Беларускае Радыё Рацыя