Çehiya senatorları apiske alınğan Nariman Celâl ve diger qırımtatarlarnı azat etmege talap ete
Bu aqta senatorlarnıñ beyanatında aytıla, onıñ metni Qırım.Aqiqatta bar.
«Bu apis qararını Rusiye Federatsiyasınıñ Kiydv keçirilgen «Qırım platformasına» bergen tsinik cevabı dep sayamız, Çeh Cumhuriyetiniñ Senat reisi de sammitte iştirak etti, anda Qırımda qırımtatarlarnıñ vaziyeti de muzakere etildi», – dep aytıla beyanatta.
Senatorlar «Rusiyeniñ Celâlnı ekstremist olaraq köstermek esassız ıntıluvlarını» qayd ete.
Beyanatta BM maruzaları ve beyanatları, BM Baş Assambleyası, BM insan aqları Yuqarı komissarına atıfnen «halqara vazifeler ve Qırımda insan aqlarınıñ Rusiye tarafından sistematik sürette bozuluvı» aqqında aytıla.
«Rusiye Federatsiyasını Nariman Celâlnı ve daa dört insannı acele azat etmesine çağıramız. Qırımda ve Rusiye apishanelerinde qanunsız tutulğan eki yüzden çoq siyasiy mabüsni azat etmege talap etemiz. Çeh Cumhuriyetiniñ ükümetini AB çerçivesinde bu siyasiy mabüslerniñ azat etilüvine irişmege ve AB aza devletleriniñ ilerideki adımlarınıñ teşebbüsçisi olmağa çağıramız», – dep bildirdi senatorlar.
Bu beyanatnı 17 senator ve tahminen 10 deputat imzaladı.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete. Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.