Aqmescitteki mahkeme Celâl ve diger faaller tutulğan soñ FSB binasına kelgen qırımlığa para cezasını berdi – advokat
Rusiye kontrolindeki Aqmescitniñ Kiyev rayon mahkemesi sentâbrniñ 4-nde qırımtatar faalleri tutulğan soñ FSB binasına kelgen İbragim Çegertmağa «fevqulâde vaziyetlerde areket qaidelerine riayet etmegeni içün» 5 biñ ruble para cezasını berdi.
Bu aqta «Qırım birdemligi» cemaat birleşmesi uquqnı Hatice Mamutnıñ malümatına esaslanıp bildirdi.
«Yevgeniy Pronin sıfatında Kiyev rayon mahkemesi imayeniñ bütün muracaatlarını red etip, İbragim Çegertmanı Rusiye memuriy bozuv kodeksiniñ 20.6.1 maddesine istinaden («Fevqulâde vaziyette ya da peyda oluv telükesi olğanda areket qaidelerine riayet etmeme») 5 biñ ruble para cezasını berdi», – dep aytıla haberde.
Qırımtatar faalleri polis bu «toplaşuvnıñ teşkilâtçısını» qıdıra, dep haber etken edi.
Rusiye quvetçileri jurnalist Ayder Kadırovğa kelip, sentâbrniñ 4-nde Franko bulvarında tutulmasınen bağlı polis bölügine kelmesi kerek, dep ağzaviy şekilde bildirdi. Kadırov olarnen celpnamesiz ve advokatsız barmağa razı olmadı, quvetçileri o yerde celpname yazıp, ziyaret saat 11:00-da olacaq dedi. Anda barıp yetiştirmedi.
Soñra iş yerine cinaiy qıdıruvnıñ eki hadimi keldi, vesiqa köstermeyip, olarnen barmasını istediler. Advokatnen laf etken erkek razı olmadı. Soñra maşina tamir hızmeti noqtasına yerli polis kelip, qanunsız çalışqanlarına dair haber keldi, dep bildirdi. Ayder Kadırov sentâbrniñ 9-nda saba 10-nda cinaiy qıdıruv yolbaşçısına kelsin, dep celpname berildi. O, belli olmağan dava çerçivesinde şaat olaraq sorğuğa çekilecek eken.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete. Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.