Avropa mahkemesi Celâl ve Ahtemovnı işkenceden qorumaq içün «acele tedbir alınması» arizasına cevap berdi – advokat
Avropa insan aqları mahkemesi Nariman Celâlnı ve Asan Ahtemovnı işkencelerden qorumaq ve Ahtemovnıñ mustaqil advokatnen körüştirilmesini temin etmek içün advokat Yevgeniya Zakrevskayanıñ «acele tedbir alınmasına dair» arizasına cevap berdi.
Bu aqta Zakrevskaya Facebook saifesinde bildirdi.
«Mahkeme qoşma malümat ve vesiqa talap etti. Mahkeme, Rusiye Federatsiyasından Celâlov ve Ahtemovnıñ tibbiy tedqiqlerine dair malümat bermesini, işkence haberlerinen bağlı Rusiye Federatsiyasınıñ resmiy cevabını talap etti. Mahkeme, RF ükümetinden Asan Ahtemovnıñ özü saylağan advokatnen körüşmege imkânı barmı, gizli körüşüv imkânı barmı, ne qadar sıq körüşe ve advokatnen angi şartlarda körüşkenine dair malümat bermesini talap etti», – dep yazdı advokat.
Zakrevskaya, mahkeme istegen malümat 2021 senesi sentâbrniñ 23-ne qadar berilmeli, dep qayd etti.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete. Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay. Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Advokatnıñ Qırım.Aqiqat Radiosınıñ yayınında aytqanına köre, Rusiye quvetçileri onı Asan Ahtemovnen körüştirmedi ve oña qarşı işkence qullandı.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.