Вераніка Іванова пра маральную кампенсацыю сілавікам

„Датэрміновае вызваленне асуджаных па „пінскай справе” ніяк не залежыць ад таго, ці выплацяць палітвязні маральную кампенсацыю сілавікам”, – у гэтым упэўненая старшыня Пінскай арганізацыі сацыял-дэмакратычнай партыі „Грамада” Вераніка Іванова.

Грамадская дзяячка гаворыць, што гэта будзе цалкам палітычнае рашэнне:

– Вось гэты крытэрый, аплаты іску і датэрміновага вяртання дадому, у адносінах да палітвязняў не працуе. Безумоўна, у крымінальна-выканаўчым кодэксе гэта прапісана, як адно з падстаў датэрміновага вызвалення. Не трэба забываць пра тое, што каб чалавек датэрмінова вярнуўся дадому, перад судом ён павінен прайсці ўнутраную камісію. Унутраная камісія – гэта прамы інстытут МУС, Дэпартамент выканання пакаранняў. Калі будзе воля з вышыні на тое, каб яны сядзелі, яны будуць сядзе хоць з пагашанымі іскамі, хоць з не пагашанымі.

Нагадаем, што 24 жыхары Пінска атрымалі не толькі вялікія турэмныя тэрміны, але і ў салідарным парадку павінны сплаціць звыш 210 тысяч маральнай кампенсацыі міліцыянтам, якіх суд прызнаў пацярпелымі ў межах “пінскай справы”. Сярод палітвязняў, як і іх сваякоў, пакуль няма адзінай пазіцыі – выплачваць ці не варта.

Беларускае Радыё Рацыя