Дмитрий Песков: Кремльдә Россиядә локдаун кертү турында сөйләшү булмады
(Казан, 23 сентябрь, «Татар-информ», Дарья Сәйфиева). Коронавирус таралу аркасында Россиядә локдаун кертү ихтималы турында Россия Федерациясе Президенты Администрациясендә фикер алышмаганнар.
«Федераль дәрәҗәдә, һәрхәлдә Президент администрациясендә, әлеге хакта нинди дә булса фикер алышу бармый», — дип хәбәр итә дәүләт башлыгының матбугат сәркатибе Дмитрий Песков.
Ул хөкүмәт штабы Россия регионнарындагы эпидемиологик вазгыятьне күзәтүен әйтте. Өстәвенә, губернаторларның аерым вәкаләтләре дә бар. Шуның нигезендә алар, коронавируска бәйле ситуация начарланып китсә, үзләре карар кабул итә ала.
«Ләкин миңа билгеле булганча, саннарның [Россия Федерациясендә коронавирус йоктыручылар] артуына карамастан, әлегә кайдадыр ниндидер карарлар [локдаун турында] кабул ителмәде», — диде Кремль вәкиле.