პოლონეთ-ბელარუსის საზღვართან კიდევ ერთი მიგრანტი დაიღუპა
24 სექტემბერს ევროკავშირში განაცხადეს, რომ საზღვრის ეფექტიანი კონტროლი მათმა წევრმა სახელმწიფოებმა ისე უნდა განახორციელონ, რომ ეს არ მოხდეს ადამიანის სიცოცხლის ხარჯზე.
„ჩვენ მოვუწოდებთ წევრ სახელმწიფოებს, რომ უზრუნველყონ საზღვარზე მყოფი ადამიანების აუცილებელი დახმარება და მოვლა“, - განაცხადა პრესკონფერენციაზე ევროკომისიის პრესმდივანმა.
პოლონეთის სასაზღვრო უწყების ცნობით, პოლონეთის საზღვარზე ბელარუსის საზღვრიდან 500 მეტრის დაშორებით პარასკევ დილით ერაყელ მიგრანტთა ჯგუფი დააკავეს.
„ერთ-ერთი მამაკაცი სავარაუდოდ გულის შეტევით გარდაიცვალა, მიუხედავად იმისა, რომ პატრულმა და სასწრაფო დახმარების ბრიგადამ სცადეს მისი გადარჩენა“, - ნათქვამია პოლონეთის საზღვრის დაცვის უწყების მიერ ტვიტერით გავრცელებულ ცნობაში.
პოლონეთი და ლიეტუვა აწყდებიან ძირითადად ერაყელი და ავღანელი მიგრანტების მოზღვავების გამო წარმოქმნილ სასაზღვრო პრობლემას, რის გამწვავებაშიც ისინი ბელარუსის დღევანდელ რეჟიმს ადანაშაულებენ.
პოლონეთისა და ბელარუსის სასაზღვრო ზოლები გაყოფილია მავთულხლართიანი ზღუდით. პოლონეთის პრემიერ-მინისტრმა, მატეუშ მორავიეცკიმ განაცხადა, რომ ბელარუსიდან შემოსული მიგრანტების მიღება მინსკის „შანტაჟზე“ დათანხმების ტოლფასი იქნება.
ცოტა ხნის წინ გაეროს ლტოლვილთა უმაღლესი კომისარიატმა დაბეჯითებით მოუწოდა პოლონეთს, მიიღოს ჩიხში მოქცეული მიგრანტები და განაცხადა, „თუმცა ჩვენ ვაღიარებთ პოლონეთში მიგრანტების ბოლოდროინდელ ჩასვლასთან დაკავშირებულ გამოწვევებს, მოვუწოდებთ პოლონეთის ხელისუფლებას, უზრუნველყოს ამ ადამიანების ტერიტორიაზე შესვლა, დაუყოვნებლივი სამედიცინო დახმარება, იურიდიული კონსულტაცია და ფსიქო-სოციალური მხარდაჭერა“.