(Казан, 24 сентябрь, «Татар-информ»). Татарстан Гидрометеорология үзәге бүген, 24 сентябрьдә һәм иртәгә, 25 сентябрьгә каршы төндә республикада урыны белән көчле яңгырлар булу ихтималы турында кисәтә. Көнбатыш циклонның атмосфера фронтлары алып килгән явым-төшем вакыт-вакыт республиканың барлык территориясендә явачак. Җилнең тизлеге талгын, юнәлеше көньяк-көнчыгыштан төньяк-көнчыгышка үзгәрүчән, дип белдерә синоптиклар. Төнге сәгатьләрдә һава температурасы Татарстанда 4 градустан алып 9 градуска кадәр җылы (Казанда җылылык 7 градустан 9 градуска кадәр). Көндез исә һава 9-14 градуска кадәр җылытачак (Казанда җылылык — 10-12 градус). Иң җылы һава республиканың көньягында көтелә. Метеорологларның алдан фаразлауларынча, киләсе атнадан Татарстан территориясендә һава торышы яхшыра.
