Альберт Шакиров үз көче белән Роберт Миңнуллинга багышлап документаль фильм әзерли

(Казан, 24 сентябрь, «Татар-информ, Рузилә Мөхәммәтова). Журналист Альберт Шакиров Роберт Миңнуллинга багышлап документаль фильм әзерли башлаган. Фильм «Роберт» дип атала.

«Үз җаема, үз көчем белән, үзем күргәнчә эшләнеп килә торган фильмның беренче анонсын тәкъдим итәм. Роберт Миңнуллинның туган авылында аңа багышланган музей эшләнү сәбәпле, халык шагыйренең авылдашлары, туганнарын хатирәләрен яздырырга Шәммәткә кайткан идек», дип яза автор үз сәхифәсенә.

«Фильм Роберт Миңнуллинның тормыш юлы турында түгел. Ул шагыйрьнең илһам чыганагы булган Сөн буе, Шәммәт авылы, аның халкы һәм шул халык күңелендә калган Роберт Миңнуллин турында», — ди Альберт Шакиров.

Автор фильмны Роберт Миңнуллинның елына йомгакларга планлаштыра.

Халык шагыйре Роберт Миңнуллин 2020 елның 27 мартында 71 яшендә вафат булды.