«Mahkemege kelip, bir şou, tsirk olacağını añlay edim». Leviza Celâlova aqayınıñ apiske alınması aqqında

Qırımtatar faali Nariman Celâl tutulğan soñ evinde statsionar telefon çaldı ve er adamınıñ sesi özüni tanıtmayıp, telefonnı Narimanğa berecek, dep ayttı. Leviza aqayı er şey yahşı olğanını aytsa da, sesi pek yorğun edi, dep hatırlay. «Meni sıñırlav tedbiri belgilengen mahkemege kirsettiler, bir şou, tsirk olacağını añlay edim, çünki bu qabaatlav o qadar saçma ve yersiz edi. Mahkemege barğanda tek bir maqsadım bar edi, onı körip, alını bilmek, laf etmek – o qadar. Anda tatası, ağası, soy-sopları, dostları, tanışları bar edi, amma tek meni kirsettiler. Maña kirmege izin berdiler, ve onı ayatta qırçmanen alıp ketkenlerini kördim… Ne quçaqlamağa, ne toqunmağa bermediler. Mahkemede laf etip oldıq, qadı mesleat odasına ketkende laf ettik, mahkeme vekilleri yasaqlamadı». Bu şekilde Leviza sentâbrniñ 4-nde tutulğan aqayı Narimannen körüşüvi aqqında tarif ete. Aman-aman bir kün devamında o, advokatlar ve tutulğan diger insanlarnıñ qorantalarınen beraber Qırımda tintüvden soñ tutulğan yaqınlarını qıdırdı. Neticede Nariman Celâl ve Asan ve Aziz Ahtemovlar «teşkilâtlanğan gruppa tarafından diversiya yapılğanında» qabaatlandı. Rusiye FSBsi «diversiya Ukraina Mudafaa nazirliginiñ Baş istihbarat idaresi tarafından teşkil etildi», dep bildire. Ukraina Mudafaa nazirliginiñ Baş istihbarat idaresi bu malümatnı «provokatsiya» dep adlandırdı. Ukraina akimiyeti qırımtatar faalleriniñ apiske alınması avgustnıñ 23-nde ötkerilgen «Qırım platformasınıñ» sammitinen bağlı, dep tüşüne.