Венгриянын премьер-министри Виктор Орбан Кыргызстанга расмий сапар менен келди
Виктор Орбан Кыргызстан менен Венгриянын алака-катышы боюнча сүйлөшүүлөрдү өткөрөт, анын жүрүшүндө кыргыз-венгер стратегиялык өнөктөштүгүнүн маселелери талкууланып бир катар документтерге кол коюлат.
Виктор Орбан ошондой эле 6-ноябрда Бишкек шаарында өтө турган Түрк мамлекеттер уюмунун (ТМУ) кезектеги 11-саммитине катышат.
Саммитке уюмга мүчө беш мамлекеттин – Түркиянын, Азербайжандын, Казакстандын, Кыргызстандын жана Өзбекстандын лидерлери, ошондой эле уюмдун байкоочу өлкөлөрүнүн башчылары катышат.
Кыргызстан менен Венгриянын ортосунда дипломатиялык мамиле 1991-жылы түзүлгөн. Бул өлкөнүн элчилиги Бишкекте 2020-жылы ачылган. Ошол эле жылы стратегиялык өнөктөштүк тууралуу декларация кабыл алынган.
Кыргызстандын президенти Садыр Жапаров 2023-жылы августта Венгрияга иш сапары менен барган. (BTo)