پاکستان وايي د طالبانو حکومت دې په افغانستان کې د "ترهګرو ډلو پرضد موثره اقدامات" وکړي
د وزارت ویاندې ممتاز زهرا بلوڅې د نومبر پر ۱۴مه په اسلام اباد کې د اونیزې خبري غونډې پر مهال د خبریالانو د پوښتنو په ځواب کې وویل چې "ترهګرې ډلې په افغانستان کې پټنځایونه" لري.
نوموړې وویل چې د طالبانو پر حکومت ټینګار کوي چې د دې په وینا، د پاکستان تکراري غوښتنې دې جدي واخلي او د ترهګرو ډلو پرضد دې سمدستي او موثر اقدامات وکړي.
د پاکستان حکومتي او پوځي چارواکو په تېرو شاوخوا دوو کلونو کې په بیا بیا تور پورې کړی دی چې د طالبانو حکومت د تحریک طالبان پاکستان (ټي ټي پي) په ګډون هغو وسلوالو ډلو ته پټنځایونه ورکړي دي چې په پاکستان کې حملې کوي.
خو د طالبانو حکومت دا تور په کلکه ردوي او وايي چې هېڅ وسلوالې ډلې ته یې پټنځای نه دی ورکړی. د طالبانو د حکومت د ویاند مرستیال حمد الله فطرت د نومبر پر ۱۱مه وویل چې د پاکستان حکومت دې "د خپلو ستونزو حل په خپل هېواد کې دننه" ولټوي.
نوموړي زیاته کړه چې د طالبانو حکومت "هېچا ته اجازه نه ورکوي" چې د افغانستان خاوره د نورو هېوادونو پرضد وکاروي. خپله تحریک طالبان پاکستان هم ویلي دي چې وسلوال یې په پاکستان کې فعالیت کوي او په بل هېواد کې پټنځي ته اړتیا نه لري.