Pakistan: 82 njerëz të vrarë në tri ditë si pasojë e dhunës sektariane

Në tri ditë të luftimeve të ashpra mes banorëve të sekteve të ndryshme në veriperëndim të Pakistanit, janë vrarë të paktën 82 njerëz dhe janë plagosur 156 të tjerë, ka thënë një zyrtar lokal të dielën, sipas agjencisë së lajmeve AFP.


Agjencia e lajmeve Reuters ka raportuar në pasditen e së dielës se një ekip ndërmjetësimi ka arritur t’i pajtojë palët për një armëpushim 7-ditor.


Pakistani është shtet me shumicë të myslimanëve sunitë, mirëpo rajoni Kurram – afër kufirit me Afganistanin – ka popullsi të madhe shiite dhe komunitetet atje janë përleshur me dekada.


Vala e madhe e përleshjeve ka nisur të enjten kur janë sulmuar dy konvoje me myslimanë shiitë, ndonëse kanë qenë nën përcjelljen e policisë.


Atë ditë janë vrarë 43 persona dhe kanë nisur të shtënat me armë zjarri.


“Përleshjet e 21, 22 dhe 23 nëntorit kanë rezultuar me 82 të vrarë dhe 156 të plagosur”, ka thënë një zyrtar lokal, duke folur në kushte anonimiteti.


“Në mesin e të vrarëve janë 16 sunitë, ndërsa 66 tjerë janë të komuniteti shiit”, ka thënë ai.


Rreth 300 familje është thënë të jenë shpërngulur këto ditë, si pasojë e luftimeve të ashpra.


Policia ka pasur gjithmonë vështirësi që të ndalë dhunën në rajonin Kurram.