Кыргызстанда жыл башынан бери жол кырсыгынан 640 адам каза болду

Ички иштер министрлигинин (ИИМ) Жол кыймыл коопсуздугун камсыздоо башкармалыгынын басма сөз кызматы жыл башынан бери өлкөдө 6 миңден ашуун жол кырсыгы катталып, андан 640 адам каза болгонун билдирди. Дагы 9 миңге жакын киши жаракат алды.


Мекеме жол кырсыктарын алдын алуу үчүн мас болуп рулга отургандарга, каттуу ылдамдыкта машине айдагандарга түшүндүрүү иштерин күчөтүү максатында “Бахус” аталышындагы рейддик иш-чара өтүп жатканын кабарлады.




Акыркы айларда эле үрөй учурган бир катар автокырсыктар болду. 23-октябрда Талас шаарындагы №4 мектептин жанында автоунаа каршы тилкеге чыгып, жөө жүргүнчүлөрдү сүзүп кеткен. Андан 31 жаштагы келин жана анын кызы менен уулу мүрт кеткен.


Кыргызстанда 2023-жылы 6 945 жол кырсыгы болуп, андан 783 адам каза болгон. Көз жумгандардын саны 2022-жылга салыштырганда 13,5% көп. 2022-жылы 7 040 жол кырсыгынан 11 миң 49 киши жаракат алып, 690 адам жашоо менен кош айтышкан. (BTo)