Сербияда чет элдик агент тууралуу мыйзам долбоору сунушталды
Мыйзам долбооруна ылайык, каржысынын көбүн чет жактан алган бейөкмөт уюмдар, бирикмелер, саясатчылар "чет элдик агент" катары катталып, өз макамы тууралуу бардык билдирүүлөрдө белгилеши керек.
Мыйзамды бузгандар кылмыш жоопкерчилигине тартылып, беш миң динардан эки миллион динар (42-17 миң долларга чейин) айып пул төлөөгө милдеттендирилет.
Мыйзам долбоорун парламенттин кароосуна киргизген партия бул демилге "бейөкмөт тармагындагы ачыктыкты жогорулатууга багытталганын" билдирди. Айрым депутаттар кээ бир уюмдар "Сербиянын улуттук кызыкчылыктарына каршы ачык иштеп жатышат" деп эсептейт.
Партиянын лидери Вулин Сербия өкмөтүндөгү ашынган орусиячыл саясатчы катары белгилүү. Ал жыл сайын бир нече жолу Орусияга барып турат жана БРИКСке мүчө өлкөлөр менен кызматташууга жооп берет. 2023-жылы Вулин "Балкан мамлекеттериндеги Орусиянын ишмердигин өнүктүрүүгө кошкон салымы үчүн" АКШнын санкцияларына кабылган.
Быйыл жазда Кыргызстанда “Коммерциялык эмес уюмдар жөнүндө” же “Чет элдик өкүл” деп таанылган талаштуу мыйзам долбоору Жогорку Кеңеште кабыл алынып, көп өтпөй ага президент Садыр Жапаров кол койгон. Ал ушул мыйзам боюнча берген маектеринин биринде “өкмөттүк эмес уюмдарга куугунтук болбойт” деп убада кылган.
Ушуга окшош мыйзам июнь айынын башында Грузияда кабыл алынып, нааразылык акциялар менен коштолгон.