Фейсбуктагы пикири үчүн кармалган Турду Акматалиевдин иши сотко өттү
Мекемеден билдиргендей, алгачкы соттук отурум 19-декабрь, саат 14:00го дайындалган.
63 жаштагы Турду Акматалиев "Бүтүн Кыргызстан" партиясынын мүчөсү. Ал 2017-жылдан бери Орусияда курулуш тармагында эмгектенип жүргөн.
Орусиянын күч түзүмдөрү аны Красноярск шаарынан быйыл 22-мартта кармап, 28-октябрда Кыргызстанга алып келингени белгилүү болгон. Сурак учурунда тергөөчүлөр Фейсбуктагы билдирүүсү үчүн кармалганын айткан.
Ага Кылмыш-жаза кодексинин 327- ("Бийликти күч менен басып алууга ачык чакырыктар") беренеси менен айып тагылган.
Турду Акматалиев кармалганга чейин социалдык тармактарга учурундагы саясий окуяларга пикирин жазып, сындап жүргөн.
Улуттук коопсуздук боюнча мамлекеттик комитет Турду Акматалиевдин кармалышына байланыштуу комментарий бере элек.
Кыргызстанда социалдык тармактын колдонуучулары жарыялаган билдирүүлөрү үчүн ар кандай айып менен камакка алынган окуялар катталып келет. (MKt)