Депутаттар Орусиядагы элчиликте мигранттар маселесин талкуулады

Жогорку Кеңештин Эл аралык иштер, коргоо, коопсуздук жана миграция боюнча комитетинин төрагасы Улан Примов баштаган мүчөлөрү 4-декабрда Орусиядагы Кыргызстандын тийиштүү органдары менен жыйын өткөрдү. Бул тууралуу парламенттин басма сөз кызматы кабарлады.


Жыйында миграциялык саясатты каттаалдаштырган мыйзамдар топтому, кыргыз жарандарынын укуктары боюнча талкуулашты.


Быйыл Москвада "Крокус Сити Холлдо" кеминде 145 кишинин өмүрүн алган куралдуу чабуулдан кийин Орусияда мигранттарга каршы маанай күчөгөн. Кылмышка шектүүлөрдүн көбү тажик тектүү жарандар экени аныкталган. Бул окуядан кийин Орусияда мигранттарга мамиле катаалдашып, келгиндердин укугун чектеген бир катар мыйзам долбоорлору сунушталган. 




Соңку учурларда кыргызстандыктардын Орусиянын аймагына киришине тоскоолдуктар болуп, текшерүү күч алууда. Москвага учуп барган кыргызстандыктардын ичинен ондогон жарандар түрдүү себептер менен Орусияга киргизилбей, артка кайтарылган.


Тышкы иштер министрлиги (ТИМ) мындан улам Орусиянын элчилиги менен сүйлөшүү жүргүзүп, кырдаалга тынчсыздануусун билдирген учурлар бар.


ТИМдин маалыматында, 2024-жылдын биринчи жарымында Орусияда 334 миңге жакын кыргызстандык мигрант бар экени аныкталган. (TSh)