Министрлер кабинетинин төрагасы Акылбек Жапаров кызматтан кетти

Министрлер кабинетинин төрагасы Акылбек Жапаров 16-декабрда кызматтан кеткени кабарланды. Бул тууралуу “Азаттыктын” өздүк булактары билдирди. Маалыматка караганда, ал президенттик администрациянын жана өкмөттүн мүчөлөрү менен 16-декабрда коштошту. Бул маалыматты өкмөттөгү жана парламенттеги бир нече булактар ырастады.


Анын кызматтан эмне себептен кеткени расмий айтыла элек.


Акылбек Жапаров баштаган Министрлер кабинети 2021-жылдын октябрь айында кызматка киришкен.


2005-жылга чейин Жогорку Кеңештин депутаты болуп, парламенттеги таасирдүү Бюджет жана финансы комитетин жетектеген Акылбек Жапаров 2005-жылдагы Жоогазын ыңкылабынан кийин финансы министри, экономика жана соода министри, биринчи вице-премьер-министр болуп эмгектенген.


2010-жылы Апрель ыңкылабынан кийин “Ар-намыс” партиясынын тизмеси менен депутаттыкка шайланган. Бир жыл өтпөй коалициялык өкмөттүн курамында кайрадан финансы министри болуп бекиген. 2015-жылы “Бир Бол” партиясы менен кайрадан депутаттыкка шайланган.


60 жаштагы Акылбек Жапаров үч жылдан ашык өкмөт башчы болуп иштеп, Кыргызстандын тарыхындагы эң узак мөөнөткө иштеген премьер-министрлердин бири болуп калды. (BTo)